الاثنين، أبريل ٣٠، ٢٠٠٧

بائع المناديل

كان جالسا هناك في نافذة الغرفة.. يفكر في ماذا سوف يعمل في الفترة القادمة.. فهو لا يجد عملا محددا لهذه الأجازة.. أجازة الصيف بدأت وسوف يستعد للانتقال إلى الصف الأول الإعداي.. وسوف يعمل بعيدا عن والده كما العام الماضي.. ولا يعرف ماذا سيعمل بعد..

"عرفت هتعمل إيه".. كان هذا صوتها وهى تناوله كوب الشاي من الشرفة المجاورة.. وكان رده أنه لا يعرف بعد.. كل ما كان يعرفه أنه لا يريد أن يعمل مع أحد .. يريد مشروعا خاصا به.. وكان معه عشرة جنيهات..

"هبيع مناديل".. هكذا قال فجأة.. سيشترى في الصباح بما يملك مناديل.. ويتوجه إلى محطة المترو.. يضع قفصا وعليه قطعة كرتون.. وعليها المناديل .. "وربنا بيرزق"..

توجه في الصباح إلى المحطة كي يجد مكانا له.. فالبائعين أكثر مما يحتمل المكان وهو يعرف ذلك.. فعل كما قال.. وانتظر الرزق.. سرح بخياله في "مشروعه"..

"بتعمل إيه هنا".. قطع تفكيره طفلا أكبر منه بهذه الكلمات.. رد عليه بأنه يبيع المناديل فكانت الإجابة "مانا عارف أنك بتبيع زفت".. بس أنا اللى ببيع مناديل هنا.. مين اللى قالك تقعد هنا.. واتبع كلامه بدفع المناديل علي الأرض..

تدخل أحد بائعي الفاكهة واقنع الأخر أن "الأرزاق بتاعت ربنا".. مال علي الأرض يجمع مناديله المبعثرة ويخفى دموعا فرت من عينه.. أكمل اليوم وعاد إلى المنزل..

في النافذة كما أعتاد أن يقف كل يوم أتخذ قراره.. ستوقف عن بيع المناديل وسيفكر في "مشروع أخر".. "طيب أنت بعت المناديل اللى كانت معاك كلها".. هكذا قالت له.. والإجابة كانت لأ.. قالت له "طيب أنا هشتريها منك.. أنا بحتاج مناديل كثير"..

ابتسم ونظر ناحيتها وقال.. لأ .. أنا هتصرف..

هناك ٢٩ تعليقًا:

LAMIA MAHMOUD يقول...

مش عارفة ليه حاسة ان الطفل ده اكيد كر وبقى حد ناجح اوي .. وبني ادم نضيف جدا

shimaa يقول...

هو انت تسكت تسكت يا احمد..و بعدين تكتب و تقطع قلبنا ..أنا مع لميا برضة ان اكيد الطفل ده بقى حاجة كويسة قوي ...أكيد الطفل اللي في اعدادي و يفكر انه يعمل مشروع بعشرة جنية و ميسمحش لحد يشيل عنه المسئولية و يتصرف هو حد كويس قوي

elkamhawi يقول...

باشا بقالك كتير مش بتدون بس منستش التدوين اهوة
تدوينة حلوة قوى على فكرة

Dananeer يقول...

حمدالله على السلامه
:)
انا كان نفسى ابيع اى حاجه و انا صغيره لما رحت رأس البر مره
كله فى الصيف بيشتغل هناك

قضية عم أحمد Ahmed Case يقول...

حراااااااااااااام عليك يا أحمد بوست حلو اوي بس يقطع القلب .
انا قلت هتكتب تقول عن قصه شارى الدبل من بائع المناديل .

بس أحييك على البوست.

dead man يقول...

حبيبتي

النجاح شيء نسبي .. هو بيتمنى ينجح أكيد.. ونضيف دى برده نسبية.. وهو بيحاول

---------------
shaimaa

كان لسه داخل إعدادي.. أنتى مش مركزة ولا إيه
:p
---------------
elkamhawi
منورني يا جميل
في حاجات كده بتبقى عاملة زى ركوب العجل ,, الواحد ميعرفش يسناها
:)
------------
Dananeer
الله يسلمك
انا مرحتش راس البر ولا مرة.. وكل مرة ابنى خالتى يزن عليا واقوله لأ يا عم اسكندرية أولى
-----------------
أبو رفعت

اللى مشرفني ومنورني لأول مرة . مش كنت تقول كنا رشينا البلوج وفرشناه رمل وورد

سلامة قلبك يا كبير

قضية عم أحمد Ahmed Case يقول...

انت رائع جدا يا هواري وطيب جدا ويبخت مراتك بيك ويا بخت اللي انت بتحبهم ويحبوك .

محبتي

قضية عم أحمد Ahmed Case يقول...

تصحيح لمن يهمه الامر
لم يسبق لهواري الزاوج من قبل .
انا اقصد باللي هتبقى مراتك علشان الاشعاعات بس .

dead man يقول...

أحمد رفت

اللى مشرفنى وهيوديني في داهية..

أيوة كده الحق وصحح ,, انا قريت التعليق قلت أنا اتجوزت من ورايا قبل كده ولا إيه.. قعدت افتكر وافتكر لحد ما قريت التعليق التاني واتاكدت ان انا متجوزتش قبل كده

محمد السيد..مش حاسكت يقول...

باشا .....


إيه ياعم الكلام الكبير ده بس ؟

عودا أحمدا يا حبيبي ...

بس استني هنا ... إيه حكاية الجواز اللي قبل كده والكلام ده؟؟
إوعي تكون اتجوزت ياعم إنت ؟؟

بقي دي أخرتها ؟؟ عمال تقول خطوبة ودبل وبتاع ...وتطلع متجوز ؟؟

تحت الساهي دواهيييييييييييييي

محمد السيد..مش حاسكت يقول...

إيه ده؟؟
أنا حاسس بناس ما صدقت قلنا اتجوز ... و حتمشي في السيرة دي ....


ياعم ما تتجوز بجد وتريحنا بقي ...

عالم تجن ....

مُصْعَب إِبْرَاهِيم يقول...

أحمد..
اوعى يكون قصدك إن ...... (أنت فاهمني)

على فكرة أؤكد لك إن .... هينجح ..
وهينجح أوي كمان
بس يركز شوية
بأحبك يا ولا

LAMIA MAHMOUD يقول...

اية يا حبيبي موضوع الجواز ده(A)
من ورايا يا احمد .. وادي اصحابك اهم شهدوا عليك .. حبقى اسال رفعت في الموضوعP:

دعاء عادل يقول...

عودا احمد يا احمد
ايوه كده استنناك كتير بس بجد البوست حلو
اوى قطعت قلبنا يا عم
وما تغبش تانى بقى ماشى

yamen يقول...

في احتمال كبير ان الحد ده يبقي انت..

و في احتمال انه مايكونش انت برضه..

بس في جميع الحالات الشخص ده هو اللي كان نفسي اكون زيه وماكنتش

تحياتي

فبركة يقول...

أينعم أنا مقصر فى حقك يا ابو حميد
اينعم بقالنا كتير ما اتقابلناش غير مرة بالصدفة عند بائع الكبدة الشهير " على بركة الله " فى ميدان رمسيس
أينعم مفيش بينا اتصالات ولا رسائل ولا حتى ميسد رغم أن كلا الشبكتين بقت فترة صلاحية مدى الحياة لكن برضه لسه المشتركين مش قادرين يحافظوا على علاقتهم ولو بميسد مدى الحياة
لكن ستبقى يا ابو حميد حد كبير فى نظرى طول العمر
خاصة مع ذلك التشابه الكبير بينك وبين هذا الطفل بائع المناديل
والدليل للناس اللى ما خدتش بالها
real story
ده جزء من حكايتك يا احمد مع الايام اما الجزء اللى جاى فالقراء قالوا عليه زى اية ولميا
أن الولد هيكبر وهيبقى حد كبير
صدقنى يا صاحبى هى دى الحقيقة
الولد هيكبر وهيبقى حد كبير ومحترم
بس ناقصه بس إنه يقرب من ربنا
وانت فاهمنى كويس
ربنا يوفقك يا رب
اخوك
شريف عبد الهادى

R.R يقول...

ياريت الكل يقدر يبقى عنده نفس الاصرار والكرامه

تحياتى لهذا الموضوع

أسوور يقول...

بوست حلو قوى
ويدل على تصميم واصرار
طفل يتحدى الفقر

تحياتى

عمرو غريب يقول...

لا لا بوست جامد بالفعل

FadFadA يقول...

بوست جميل و صادق جدا , حسيت اننا بقرأ قصة من قصص تشارلز ديكنز
تحياتي
محمد

Oma يقول...

حمد الله على السلامه
بوست شديد بجد
وفينك من زمان راجع بقوه يعني
اولى اعدادي وبيفكر كده اكيد ده حد هايل اوي وهيبقى راجل اوي لما يكبر
نورت المدونه بتاعتك

FadFadA يقول...

لماذا هذا التوقف الذي طال ؟
في انتظار تدويناتك
محمد

We2am يقول...

alf 7amdella 3la elsalma ya dude :)
tab3an ana m3a kalam lmy w shosh elle et2al fel2wl,elle byktb kaman 7ad mo7trm w bne 2dam ndef awe :)
enma ana mla7za 7war kida en elcomments 3ndk b2t 3mla zay elmsngr msh 3arf leh! :D

Reemo يقول...

رغم صغر سنه لكن عقله سبقه بمراحل
طفل يملك كل الطموح ده
لازم فى يوم يبقى حد ناجح جدا
ميرسى على الكومنت فى المدونه عندى
تحياتى

حلم الحرية يقول...

لو في كل مرة حتغيب فيها حترجع ببوست جامد كده خلاص يبقي حنسمحلك تغيب براحتك


اما بقي بالنسبة للبوست
هو قالها في الاخر
هو حيتصرف
حيتصرف في المناديل
وحيتصرف في غير المناديل


بس تعرف هو المشكله ايه
المشكلة في السؤال اللي هيه سالتهوله في اول الموضوع
(عرفت هتعمل ايه؟)
هل يا تري هو عارف؟؟
!!!باحس انه مش عارف
متهيالي هو لسه بيدور عالطريق الصح
وان شاء الله حيلاقيه


بس زي ما الكل قالوا واتفقوا واجمعوا

انه هينجح

ان شاء الله هينجح وهيبقي حاجة كويسة في المستقبل

غير معرف يقول...

اي ياعم الحلاوة دي

القصة جميلة وخصوصا عمقها رغم بساطنها


لو حبيت اكتب في عشرينات اعمل ايه

dead man يقول...

محمد السيد

ادعيلنا نتجوز واحنا نتجوز يا مولانا :)

------------
مصاعيبوز

ادعيله ينجح

وانا كمان بحبك ياض :p
----------

lamia

حبيبتي .. احمد رفعت هو الوحيد المسئول عن ما يصدر منه من اقوال او افعال او اى حاجة تانية.. ويمكنك الاستعلام من السجل المدني
:)
---------
دعاء

ميرسي يا باشا وميوحشكيك غالي :p

-------------
yamen

صدقنى من اللى انا اعرفه عنه .. هو ميحبش ان حد يعدي باللى هو شافه

------------

فبركة

شيكو .. ربنا يخليك يا معلم علي الكلام الحلو ده .. بس انا ليا تعليق معلش.. انا شايف انه محدش ليه الحق انه يتكلم علي علاقة حد بربنا.. دى حاجة بين الواحد وربه..

وخصوصا انك متعرفوش ومتعرفش علاقته بربنا عاملة ازاى..

---------------
R.R.

وتحياتى لك
------------

ياسمين
طفل يتحدى الفقر.. واشياء اخرى
------------

عمرو غريب
ربنا يجبر بخاطرك:)

------------
fadfada

تشارلز ديكنز مرة واحدة,, ناقص كمان تقول انها شبه اوليفر تويست :p

ربنا يخليك علي الكلام الحلو
----------------
oma
ربنا يخليكي

المدونة منورة بيكو
---------
we2am

مانتى عارفة انا محدش بيقرالى الا أصحابي .. ربنا يجبر بخاطرهم زي ما بيجبروا بخاطري
:p
----------

REEMOO
ادعيله ينجح
------------
واحدة بتحب البلد دي

هو هعرف هيتصرف ازاى دي فيها حاجات كثير .. بس هو غالبا عارف هو عايز ايه في اغلب الحالات

وان شاء الله هينجح
--------------
يحيي أديب

دى حلاوة المولد
:p

لو حبيت تكتب في عشرينات ممكن تبعت ميل او تكلمهم في التليفون

غير معرف يقول...

متهيالى اى قصة كفاح اخرها نجاح
وربنا يوفق كل المجتهدين

رباب

Ganna Adel يقول...

(f)
البوست جميل اوى و كالعادة مقدرتش أبطل عياط قول بتاع نص ساعه بعد ما قريته رغم إن دى طبعا مش أول مرة أقراه..
ربنا يوفقك :)