الخميس، أكتوبر ١٨، ٢٠٠٧

ومصير الضي لوحده هيرجع

في الأول علشان اللى مش واخد باله يبقى فاهم هو في إيه، البوست قبل اللى فات تسنيم بعتت التعليق ده " تصدق يا أحمد هيا ضاقت من سنة وتلات شهور ومن يومها وأنا مستنياها تُفرج ومفيش أمل لدرجة إني بقول إنها مش ضاقت لأ دي خلاص اتسدت خالص.. ربنا يفرجها من عنده يا أحمد".

وأنا رديت عليها قلتلها "لو اتسدت خالص .. اكيد هيبقى في غيرها :) واكيد ربنا هيفرجها .. أكيد" ، فردت هي تاني وقالت " ولو احنا عايزينها هيا مش عايزين غيرها نعمل ايه يا أحمد؟؟"

وعلي الرغم من أن السؤال ده صعب أوى أى حد يجاوب عليه، وخصوصا أنا، إلا إن بجد السؤال خلاني وقفت قدامه.. وعلي الرغم من أنى كنت لسه قاعد معايا مين يومين وقلت هنبقى رجالة ونقف وقفة رجالة J إلا أن الجملة دى وقفتني وخلتني اقول يا تري هقدر المرة دى ولا هعمل زي كل مرة ..

المهم.. السكة مسدودة واحنا واقفين علي بابها وكل شوية نقول مش عايزين غيرها، مع أن ممكن أوى يكون في سكك تانية مفتوحة قدامنا والناس معلقة يفط ترحيب وفرشين الأرض ورد.. واحنا لسه واقفين هناك بنبكي علي باب السكك المقفلة يمكن تتفتح.. مع أن الواحد لو خد رجله واتمشي قدام شوية هيلاقي الميدان متفرعة منه سكك كثير مفتحة .. ينقى منها اللى هو عايزة..

بصي .. في حوار حلو اوي بسمعه في أفلام كثير، بس اخر مرة سمعته فيها وفاكرها كانت في فيلم اسمه the number 23 وهو

I had this uncle, his name was charlie. And, uh, one day, he read in his stars.. That he was gonna fall in love.. With a woman in red.. So he went out looking all day long And he found one.. Six months later, they were married.. Two years later, the woman in red divorces my uncle, Takes him for everything he's got.. He's out there right now At this very moment... Still looking for the woman in red. Figures he just got the wrong one.

يعني باختصار.. محدش يعرف اذا كانت السكك اللى اتقفلت ومش عايزة تتفتح كانت سكته من الأول ولا لأ.. كان من الصح يمشي فيها ولا لأ.. وايه يضمن له انها لو اتفتحت مش هتتقفل تاني؟..

بصي كده حواليكي وشوفي في كام حد بيقولك أنك تستحقي سكة أفضل، خصوصا أن أغلب اللى واقفين قدام سكك مقفلة مش هما اللى قافلينها، وانما هي مقفولة في وشهم، بينك وبين نفسك أنتى تستحقي إيه.. تستحقي أنك تفضلي قاعدة مستنية سكة تفتح ، وانتى في الغالب عارفة انها مش هتفتح ، علشان أكيد أنتى حاولتي قبل كده، ولا تستحقي أنك تمشي في سكة سالكة .. حتى لو هتمشيها لوحدك..

قارني بين كلام الناس اللى بتقولك أنك أفضل وبين الكلام اللى مخليكي تقولي انك لسه عايزاها هي ومش عايزة غيرها.. أكيد في ناس في اللى بتقولك أنك أفضل أنتى عارفة أنهم مبيقولوش كده علشان يجاملوكي.. وأكيد في أسباب في اللي مخلياكي متمسكة بالسكة المسدودة انتى عارفة بينك وبين نفسك أنها ممكن تتنسف.. بس تدوسي علي قلبك حبة..

الكلام ده ممكن تكوني عارفاه.. وكلنا عارفينه.. بس الصعب أنك تنفيذه.. أنك تتأكدي أنك تستحقي الأفضل وتتصرفي علي الأساس ده، تقومي تتمشي ، مش شرط تدوري علي سكة تانية.. بس علي الأقل تبقي بتتمشي وأكيد رجليكي هتوديكي لوحدها في سكة تانية .. ممكن تكون هي السكة اللى أنتي كنتى بتدوري عليها من الأول..

هذه هي المعادلة .. أنت تعرف أن الجلوس علي باب الطريق المسدود غير مجدي ولكنك لا تستطيع القيام والمشي.. حتى لو كنت ستمشي وحيدا..


والوحيد اللى هي هيساعدك في ده هو انتى.. انك تقدري تاخدى القرار أنك تمشي.. انتى الوحيدة اللى هتقدري تقومي نفسك .. بس يبقى عندك شجاعة القرار والصبر علي تنفيذه.. اه هتتعبي .. اه هتنتكسي كل فترة .. بس لو القرار جواكي هتقومي تاني وهتبقي زي الفل ..

جربي كده.. سيبي السكة المقفولة ورا ضهرك وقومى اتمشي شوية .. واسمعي الأغنية اللى شغالة لوجيه عزيز.. وابقى قوليلي رايك..

وان مقدرتش تضحك متدمعش ولا تبكيش وان مفضلش معاك غير قلبك مش هتموت هتعيش.. وان سألوك الناس عن ضي جوا عيونك مبيلمعش متخبيش قولهم العيب مش فيا ده العيب في الضي.. وأنا مش عاشق ضلمة ولا زعلت الضي.. صير الضي لوحده هيلمع ومصير الضحك لوحده هيطلع مبيجرحش ولا يأذيش"..

هناك ٢٤ تعليقًا:

Lens Geek يقول...

مش اقدر اقولك حاجه غير ان اننا بنحتقر نفسنا من غير ما نقصد. و احينا بنستمتع اننا نعيش دور اليهودي اللي اتظلم من الف سنه. ايا كان بس الالم هو الي بيفكرنا بالناس اللي ظلمونا بالناس اللي خانوا وعودهم وبالناس اللي تخلوا عنهم في نص الطريق. الواحد بجد مالوش الا ربنا في الوقت ده

ربنا يعني و يعين كل اللي زيي

الحلم العربي يقول...

يا سلام
و جون و جون و جون

بجد لا فض فوك يا افندم ....ارفع لك القبعة
يمكن انت بتتكلم بلسان حال ناس كتير مش عارفين يخرجوا من القمقم اللى حاطين نفسهم فيه و عايزين يفضلوا في دور الضحية لأنه أحيانا بيكون دور مسلى ....
لكن لما العمر يمر بيهم و يلاقوا نفسهم ما عملوش غير انهم استنوا القطار في الاتجاه المعاكس هيعرفوا وقتها انه خلاص مفيش امل

ساعات بنكون عارفين ان ربنا هيعمل لنا الخير لكن احنا بنعند ...و كأننا بنتشرط على ربنا و العياذ بالله ....و ننسي ان ربنا ما منعنا إلا ليعطينا و ان من ترك شيئا لله عوضه الله خيرا منه ...و بجد دي حقيقة عمرك ما تمشي في طريق و تدعي ربنا فيه اوي إلا و ربنا يديهولك و لو ما ادهولكش يديلك حاجة تانية احسن بكتييير ...لكن احنا نصبر و نبصر الطريق الصح

كلامك جميل جدا يا هواري و يا رب تقدر تنفذه لأنه فيه الشفاء ...و اسأل مجرب

على فكرة البوست اللى فات كان قصدي بلا تعليق مش حاجة وحشة و الله لكن كنت في حالة نفسية مختلفة تماما عن البوست و كنت عايزة اعلق بس مش عارفة اقول ايه فقلت لا تعليق ...توهان بعيد عنك

تحياتي و معلش طولت عليك

Unknown يقول...

تحفه بجد يااحمد
انت ماتتخيلش انا مبسوطه منك اد ايه بسبب البوست ده

انا سعيده جدا ان دي بقت طريقة تفكيرك

كل الكلام اللي قلته صح

مين قال ان السكه دي كانت بتاعتنا او اننا كان لينا خير فيها

الوقوف قدام الحيطه السد درب من الحماقه مش اكتر

انت عارف القلب مهما كان تعبان ومتقطع بيقدر انه يجمع نفسه تاني ويخف

المهم انه موجود معاك

هو بس محتاج شوية وقت وفعلا هيبقي زي الفل

سيبه وهو بكره هيضحك لوحده
وهيضحك بنفس مش عشان قدام الناس بس

ربنا يوفقك يااحمد ويسعدك

المهم اننا نكون اتعلمنا من الدورس اللي مرينا بيها
عشان عملانا مانغلط نفس الغلط تاني

خلود صلاح يقول...

هيروووووووووووو
انطلــــــــــــــــــق
انا مبسوطة ليك:)

تــسنيـم يقول...

قرأت وسأعود

:)

تــسنيـم يقول...

ها قد عُدت :)

سعيدة أنا بهذا التغير الملحوظ في كلماتك وبحالة الاقناع التي تسعى جاهدا أن تترك أثرها في وفرحة بيدك الممدودة لي لمساعدتي ومعنى توجهيك هذا الكلام لي أنك مقتنع كلية به وهذا هو الأهم


أمـــا أنا فتكمن المشكلة أن هناك من يشاركني الوقوف أمام الباب المسدود نسعى جاهدين لعبوره بالرغم من فشلنا في مرات سابقة وبالرغم من استسلامنا لأكثر من مرة وافتراقنا وذهابنا للتمشية تعود خطواتنا أدراجها وأنظر عندما تعود بي قدماي عند الباب المسدود لأجده هناك قد سبقني أو يعود هو ليجدني جالسة بجوار الباب أطرق بشدة لعله يُفتح

ومازلت مقتنعة تمام الاقتناع أننا قادرين على كسر الأصفاد التي تُقفل هذا الباب في وجهنا وما زلت أتطلع إلى السماء وأنا أخبرها أن لو كان ما نحن فيه اختبار للقوة والصمود فسنريكِ من أنفسنا خيرا وأننا نستحق أن نعبر هذا الباب في النهاية

صدقني يوما ما سأذهب إلى التمشية ولن أعود وذلك ليس حين أن يتخلى عني من يساعدني ويمدني بالقوة للصمود ولكن حين أقتنع أن ما أفعله هراء لا طائل منه ، وقتها سأتركه _ إن لم يكن قد تركني بعدما اقتنع هو_ وأمضي لأبحث عن باب أخر وعبارات ترحيب

أما بالنسبة للمشهد الذي ادرجته في تدوينتك فهذا الرجل كان أمامه مثلا ثلاث سيدات يرتدين الأحمر اختار منهن واحدة ربما كانت الأسهل أو الأقرب أو الأكثر فتنة ولم يوازن بين احتياجاته وبين هيأتهن فاكتشف في النهاية فشله وبتتطبيق ما فعله على موقفي أجد أن هناك مثلا خمس طرق لفتح الباب المسدود اختارنا منها مثلا أن نكسر المزلاج وصممنا وأعدنا الكرة مرارا ومرار ولم ننتبه لضعف المفصلة التي لو كنا وجهنا نصف طاقتنا لها لكنا نسفنا الباب من البداية

وهذا ما نفعله هذه الأيام نغير الطريقة ولكننا لن نترك بابنا المسدود:)

أن تفعل نفس الفعل بنفس الطريقة وتنتظر نتيجة أخرى فهذه هي الحماقة

أطلت التعليق ولكن البوست كان في الأصل موجه لي أنا

تحياتي يا أحمد ;)
...................................
ملحوظة: اكتب أول كلمة تلفظت بها بعد انتهائك من قرءاة تعليقي لأول مرة دون الرجوع إليه للتعمق فيه مهما كانت هذه الكلمة :)

shirry يقول...

عجبني اوي البوست دا مع اني اول مرة ازور المدونة
يعني عجبني طريقة التفكير الايجابية
وانك بصيت علي نص الكباية المليان
بجد حلو اوي

مستنياك في مدونتي

MarwaAshraf يقول...

لا بجد بجد جااااااامد جدا... أنا تقريبا كنت في نفس الموقف وقعدت يجي أربع سنين مش شايفة غير السكة المقفولة بس الحمد لله ربنا وقف جنبي وخرجني منها


عندك حق أوي في كل كلمة قلتها.. الواحد لازم يستخدم عقلة شوية ويساعد نفسه

تحياتي للبوست الجامد وعاوزين من ده كتير

:)

غير معرف يقول...

ياللعجب ماذا ارى
من هذا صاحب الرؤية البيضاء
ايكون مثلا هوارى :)

حلوة اوى الرؤيا دى مدام الباب مسدود قوم دور على واحد تانى
ولو ملقتش نفسك ف السكة دى
مسيرك هاتتعود

جامد زى العادة
رايك حكيم اوى وبيعقدنى :)
منين الاقى الحكمة دى

ana rana 3amra :)

حلم الحرية يقول...

نش ننكن
نش نعقول
نش قادرة اسدك (اصدق ) عينيا

دي مدونة هواري وللا انا متهيالي

شكلي جيت هنا غلط

وللا باينلها هيا بعد التجديد

ياااااااارب
داااااااااااااااااااااايما

بجد سعيدة جدا اني اقرا الكلام ده هنا

عجبتني اوي جملة
ـــ

والوحيد اللى هي هيساعدك في ده هو انتى.. انك تقدري تاخدى القرار أنك تمشي.. انتى الوحيدة اللى هتقدري تقومي نفسك .. بس يبقى عندك شجاعة القرار والصبر علي تنفيذه.. اه هتتعبي .. اه هتنتكسي كل فترة .. بس لو القرار جواكي هتقومي تاني وهتبقي زي الفل

ــــــــــــ

حسيت انك بتتكلم بلساني

هو فعلا قرار
تفاؤلنا قرار
سعادتنا قرار
ابتسامتنا للحياة قرار
تميزنا ونجاحنا قرار

مشكلتنا اننا مبنتخيلش ان الموضوع بايدينا وانه بس مطلوب مننا ناخد القرار ونبدا ننفذه

تحياتي ليك
ودعائي باستمرار الروح دي هنا

dead man يقول...

Cerebrosus world

وأكيد ربنا معاك .. ويعينك

------------------------

الحلم العربي

وادينا مبنعملش حاجة غير الصبر

:)
تحياتي
------------------

esraa

تفتكري؟
-------------------
خلود صلاح
:)
----------------

تسـنيم

بصي يا ستى أول كلمة قلتها لما قريت التعليق مكانتش كلمة .. كانت ابتسامة .. بس معرفتش ارد بيها في وقتها علشان كان النت عندي فاصل وكنت في نت كافيه والمود كان تحت الواقع بشوية

ونظرا لأن المود مازال مسيطر فأنا مش هعرف أطول عليكي في الرد .. بس انا اللى خلاني ابتسم نفسك الطويل ..

لو كان واقف معاكي بيحاول يكسر الباب المسدود يبقى خليكي ..

طالما ان الجندي الذي الى جوارك مازال يحمل درعا وسيفا في أرض المعركة فهو يستحق أن تحارب من اجله .. ان تدافع عنه بدرعك وتزود عنه بسيفك

تحياتي
------------------
shirry

المهم هو أن تقتنع أن نصف الكوب ممتلئ بعد أن تراه.. فمن هنا لا أرى الكوب من الأصل
---------------

RAMA
يا بخت من كان ورا وجابه الزمن قدام
:)

---------------
rana 3amra

حكيم مين بس .. ربنا يجبر بخاطرك
:)
------------------

حلم الحرية

اليد الوحيدة القادة علي مساعدتك هى تلك الموجودة بنهاية ذراعك..

Samia يقول...

هوارى .. أنا دخلت مدونتك لأول مرة من كام يوم .. و كعادتى مع أى مدونة جديدة بالنسبة لى .. أجيبها من أولهل لآخرها .. و دى فى حالة واحدة بس .. لما تشدنى فعلا و أحس إن صاحبها بيقول حاجة.. و انت بأة مش بتقول حاجة واحدة .. انت بتقول حاجااااااااااات .. بس جو البوست ده غير .. ياترى ده تغير حقيقى ؟ .. و "مستحيـــل ياحزن راح تسكن " ؟؟؟ ... و لا إيـــــــه ؟؟ :)

تحياتى

=======

ملحوظة : أنا حطيت لينك لمدونتك عندى :)

فى القلب يقول...

عارف يا أحمد مجرد التدوينه دى
كلام راجل جامد جدا و فعلا دى و قفه رجل
مجرد ما حسيت أن حد محتاج مساعدتك هبيت تساعده رأى أنت شخصيا صعب عليك بس قويت نفسك و كتبت من قلبك
عارف ليه يا احمد لانك رجل حقيقى

التدوينه السابقه لك قرأتها
أنتى عارف حصلت حاجه غريبه بعدما أنهيتها
بكيت دون أراده
ربنا يسعدك يا رب يا أحمد
أشكرك كثيرا على سؤالك عنى

Oma يقول...

طب ماانت حلو اهوووو يااحمد
ياريت بقى تبدأ بنفسك وتمشي وتدور على السكك التانيه وتشق طريقك
احسنت يااحمد بجدددددددد

simple girl.. ..simple dream يقول...

انا كنت كاتبة حاجة عن نفس الموضوع دة
اسمها

لن اكون زومبى بعد اليوم

ياريت تقراها وتقولى رأيك

غير معرف يقول...

هوارى .. ممكن تحط لينك لأغنية وجيه ؟ أصلى عايزاها ز مش عارفة أجيبها منين .. شكرا

FadFadA يقول...

و مخبي كل ده ليه بس ؟
فاكر لما كنت بتكلم معاك على الطاقة الايجابية و السلبية و الكلام ده , اللي انت كاتبه ده هو الطاقة الايجابية
و من الواضح ان الطاقة ديه جواك قوية جدا بس انت أوقات لا تريد اظهارها و اخراجها

نيجي للتعليق
إيه المشكلة لو غيرنا الطريق ؟
احنا عاوزين نوصل لحاجة معينة و الحاجة ديه الطريق اللي بنحاول نوصلها من خلاله مسدود , طيب ما نغير الطريق و نشوف طريق تاني حتى لو أطول , أهم حاجة يوصلنا
يعني الهدف ماتغيرش , اللي اتغير هو طريقة الوصول
أهم حاجة نتأكد ان الهدف ده فعلا هدف يستاهل المحاولة , و انه هدفنا فعلا و حلمنا اللي نفسنا نحققه
ممكن يكون حلم مش حلمنا , ساعتها مهما حاولنا اننا نوصل مش هينفع
و لما نتأكد انه حلمنا ساعتها عمرنا ما هنستسلم , و لازم نوصل
JUST KEEP SWINGING

جميلة قوي الأغنية . و اختيار مناسب جدا و رائع , كنت سمعتها من أحمد زكي في فيلم - أظنه هستيريا - و كانت عجباني جدا

ربنا يسعدك يا رب
و ما تحرمناش من الحاجات الحلوة ديه

محمد

dead man يقول...

Carnation

ربنا يخليك علي الكلام الجميل ده ، وبالنسبة للحزن ، فالحزن دايما ساكن.. بيقل وبيزيد حسب الحالة واحوال الحياة ..

في مرة أحد المعلقات في الموقع اللى انا شغال فيه علقت علي حاجة انا كتبتها وقالت كلمة حلوة أوى .. قالت

ده معنى فلسفى كبير لان فعلا من قلب الحزن بتاتى لذه غريبه لا تقل ف جمالها عن اجمل لحظات الفرح و دى اللى بتعمل الشخص الرومانسى لان الشخص الرومانسى مش هو العاطفى ده اعتقاد خاطىء لان الرومانسيه هى المود المتقلب المائل الى الحزن و بنسميها ف الادب الانجليزى melancoly

ويافندم يشرفنا لينك المدونة بتاعتي عندك .. بس في مشكلة صغيرة انا مش عارف اوصل لمدونتك
-------------------

فى القلب

ربنا يخليكي علي الكلام الكبير ده .. واسفين علي دموعك..

وربنا يسعدك انتى كمان.. والسؤال ده يافندم اقل حاجة

-------------------

OMA

ربنا يخليكي يا جميل
------------------
simple girl.. ..simple dream

انا قريتها بالفعل وهي جميلة جدا .. اعذريني انى معلقتش عندك علشان المود مش تمام بس حبتين.. بس اكيد هرجع واعلق تاني لآن البلوج كله جميل ..

تحياتي
-------------------
Anonymous

والله انا حاليا اللينكات مش عندي .. بس الأغانى موجودة لو حضرتك عايزاها قوليلي .. وعلي كل انا هبقى اجيب اللينكات واحطها هنا تاني

بالمناسبة.. متشرفتش باسم حضرتك
-------------------

FadFadA
يا باشا مفتقدينك والله ومفتقدين الكلام الكبير

ZAWB3A يقول...

انا اول مره ازور المدونه دي
وعاجبني البوست ده اوي بس حبيت اوضح وجهه نظر شخص واقف قدام الباب المسدود ده
في اوقات لما بفكر بس مجرد تفكير اني ادور علي سكه تانيه او حتي امشي شويه بحس ان ده خيانه لحلم حلمته او امل عشت عليه
خيانه لشخص وقف معايا قدام الباب حلم معايا انه يتفتح
وممكن تكون وقفتي قدام الباب ده وانتظاري لاني عارفه قد ايه الباب ده لما يتفتح هيجيب سعاده
كفايه حتي السعاده اللي هتيجي من اني فضلت ورا حاجه لحد ماعملتها
الموضوع مش موضوع اننا نستحق احسن من كده
لا اني استحق اللي ورا الباب ده استاهل اني اوصله او انا احق بيه مثلا

vision يقول...

البوست ده صح اوى جميل بجد تسلملنا ايدك واسلوبك الواصل

nyira_elsheiref يقول...

بجد كلام منطقى ورائع بس زى ما انت قولت "الكلام ده ممكن تكوني عارفاه.. وكلنا عارفينه.. بس الصعب أنك تنفيذه"
وقد تكون المشكلة يا أحمد فى التمشيه لأن فقدان الأمل يفُقد القدرة على الحركة وعلى الحياة بكل أوجهها

dead man يقول...

ZAWB3A

عارف الاحساس ده اوى .. عارفه بجد..

------------------

camera_girl

أولا نرحب بعودة تعليقاتك الجميلة عندنا

ثانيا شكرا علي الكلام الجميل ده
--------------------

nyira_elsheiref

اتفق معاكي في كل حرف

تحياتي

Samia يقول...

تصدق معاك حق .. و أنا باقول هو ليه محدش بيعبرنى بكومنت واحد !!!على العموم أدى اللينك للبلوج بتاعى .. ياريت إنت و كل ضيوفك تشرفونى .. هو صحيح إلى حد كبير جدا .. بلوج فقير .. بس أدينى باحاول .. مستنياكوا
http://whatsinthemidle.blogspot.com/

dead man يقول...

Carnation

علم وتم التنفيذ يا باشا
:)