الخميس، يوليو ٢٧، ٢٠٠٦

الست فوزية.. وأختها الإسرائيلية

الدنيا في لبنان ولعت لما شافوا صورة ملكة جمال لبنان مع ملكة جمال إسرائيل.. الناس تزعق وتصرخ وتقول وهو ده معقول.. ولا حياة لمن تنادي

لكن احنا مالناش دعوة بالجميلة اللبنانية ليها أهل بلدها يكلموها.. خلينا في خيبتنا المصرية .. الست فوزية ملكة جمال الوحشين في مصر.. اللي لو هي أجمل واحدة في مصر.. يبقى عليه العوض في البنات يا جدعان..

المهم ملكة جمال الوحشين في بلدنا اتصورت صورة كده مع ملكة جمال إسرائيل برضه.. الست فوزية كانت مبسوطة قوي وهي مع أختها الإسرائيلية.. أكنها بتحل مشكلى القدس معاها والدنيا هتبقى وردي..

أكثر حاجة ضايقتني في الموضوع أن الست فوزية أتصورت الصورة اللي حضراتكو هتشوفوها دي يوم 10 – 7 يومها كانت إسرائيل مبهدلة قطاع غزة وأطفال وناس بتموت بصواريخ إسرائيلية وهي رايحة تتصور مع الإسرائيلية.. يبدو انها كانت جهود من أجل السلام

ملحوظة أحب أثبتها هنا أنا معترض أصلا علي مسابقة ملكة الجمال دي أصلا.. سيبك من الناحية الدينية.. حتى بيقي شكلها وحش أوي أكنها سوق رقيق والرجالة قاعدة تعاين "الجثة".. سوق رقيق والله يا ناس.

هناك ٤ تعليقات:

love4u يقول...

الصورة دى ناقصه فين ملكه جمال امريكا عشان يبقى الاجتماع كامل و نقدر نناقش القضيه بشفافيه ووضوح وربنا يستر علينا و الايام قادمه
تحمل مفاسد و خير و النهايه انتصار الخير ان شاء لله
فالنراجع انفسنا

...دنيتي يقول...

تفتكر هي فازت ليه بالقب وهي بالمنظر دة؟
بعد ما تجاوب هتعرف ان هي دي يادوب تصرفاتها




فهمت مني حاجة؟


طلب اخير
والنبي يا عمو غير صورتك اللي في البروفايل دي
بتخوف اوي
:(

karakib يقول...

اكيد ليها فكر سياسي معين !!! ارجوك ارجوك ما تضايقش القمر اللي واقف فالصوره ده
سيبها !! يعني حد فتح بقه لما عملنا تطبيع و تلزيق و ترتره
يا راجل جت علي ديه !! ده عمر الشريف في عز الحرب في 1967 طلع علي غلاف مجله بيبوس ممثله اسرائيليه من فمها ... و كتبه القبله الوحيه ما بين مصر و اسرائيل !! يعني الموضوع قديم
و كل ده لدعم العلاقات الاستراتيجيه القوميه المهلبيه الملوخيه اللي كل بتاعاتهم مرخيه ما بين البلاد الغربيه الشرقيه الجنوبيه و اصلاح و انفتاح و لا مساس
خلينا في حالنا بقي
و لا ايه ؟؟
خلينا في حالنا
اعمل كأنك مش شايف و لا حتي شايف و مطنش .. اصله بايدك ايه !!
انتوك

كلبوزة لكن سمباتيك يقول...

لسة في ناس ملهاش في البطيخ و لا فارق معاها حرب و لا ضرب و لا تشريد
المهم السبوبة تيجي منين
لو حتي من عين العفريت
معلش يا ديدمان
انا كمان مش بعترف بالمسابقات دي
دي مسابقة جتت عريانه لا حياء لها

انتم السابقون و نحن اللاحقون