الاثنين، يونيو ١٩، ٢٠٠٦

جواب من حبيبتي.. تسنيم

لحظة خاطفة شعرت بها منذ يومين.. لحظة سعادة خالصة.. بعيدا عن لحظات السعادة التي نفتعلها.. فنحن نحاول أن نكون سعداء.. ولكن نادرا إن لم يكن من المستحيل أن تتوجه إلى المنزل في يوم ما لتجد خطابا يخطفك إلى لحظات من السعادة الخالصة..

وقبل أن تطرحك الظنون وتتخيل أنى بلعب بديلي بره القبر لازم تعرف أن تسنيم دي بنت أختي.. شاءت الظروف أن تطلق أختي من زوجها وتسنيم لسه مبتعرفش تمشي.. رجعت أختي عندنا في البيت..

تسنيم اتربت علي ايد العبد لله.. امها تزعقلها وانا موجود يبقى اخر يوم في عمرها.. اللي يقرب من تسنيم يموت.."تسنيم" منطقة خطرة.. ممنوع الاقتراب أو التصرير..

المهم أم تسنيم اللي هي في نفس الوقت أختي أتجوزت من حوالي شهر أو شهر ونص.. وطبعا تسنيم قعدت معانا أسبوع بعدين راحت تقعد مع مامتها.. وأنا لظروف ملخبطة في الشغل شوية قعدت فترة ما بشوفهاش.. وهي كل ما تيجي وما تلقينيش الحاجة تقولي ان تسنيم سالت عليك وزعلت انك مكونتش هنا..

المهم تسنيم اخر لما زهت سابتلي جواب مع الحاجة وقالتلها أديه لأحمد.. والله كنت هعيط لما شفته وقريته..

الجواب مفيهوش حاجة غير يا أحمد يا سكر.. يا أحمد يا "أمر"..، أمر بالستر، بحبك يا أحمد.. والله أنا هعيط وأنا بكتب
مش مكمل بأه هه الجواب أهه أقروه

هناك ٥ تعليقات:

العـابــــــــره يقول...

قرأت الجواب وحسيت بمشاعره،ربنا يخليهالك ويخليك ليها

غير معرف يقول...

أنا اصلا عيطت لما قريت الكلام

اجمل حاجة في الدنيا هي الاطفال ومشاعر الاطفال
لانها مشاعر بريئة نقية واهم حاجة صادقة
هي لما قالتك قمر وعسل كانت عايزة توصفك باحسن الصفات الي تعرفها كانت عايزه توريك قد ايه هي شايفاك حاجة حلوة

يااااااااااااه بجد ده احلي احساس في الدنيا انك تتحب من طفلة بالشكل ده
ربنا يباركلك فيها

غير معرف يقول...

حرااااااااااام عليك يا احمد هو انا مخشش بلج ابدا غير وانا طالعه معيطه ايه دا , كفايه عشرينات يا بني
بس سلملي عليها كتير كتير كتير كتير كتير وبوسهلي من هنا وهنا

مُصْعَب إِبْرَاهِيم يقول...

أنا اللي هيغيظني و يفرسني إني يوم ما جينا عندك كنت عاوز أشوفها بس ما كانتش لسة جت، و لما مشينا هي جت :s

ربنا يحفظهالك يا رب و أنت تستاه كل خير يا أحمد و الله

غير معرف يقول...

تعرف يا احمد عايز تختبر صدق شىء او تشوفه على حقيقته اسال طفل صغير لان مشاعره بتبقى بيور نقية لسه لم تدنس بلؤم الحياة... ربنا يبارك لكم فيها وواضح انك خال حنين قوى عقبال ما نشوف اولادك
<< ودول هاتضربهم بالحذاء>> وابقى افتكر كلمتى دى

رباب