السبت، نوفمبر 04، 2006

وأخيرا بوست!

الأول وقبل ما حد يفهمني غلط بوست هنا مش جاية من فعل البوس وانما جاية من post، لحسن حد يفتكر انى كنت في وسط البلد أول وتاني يوم العيد. وأخيرا بوست علشان أنا كان بقالي كثير مكتبتش حاجة في البلوج الفقير بتاعي وأعتقد أنه محدش أفتقد لا شخصي المريض ولا تدويناتي، ومن يفتقد dead man.

علي كل حال الكام يوم اللى فاتو فرحت فيهم كام مرة وده دايما بيخليني أقول اللهم أجعله خير علشان أنا كل مرة أفرح تحصل مصيبة.

اول فرحة

يوم الثلاثاء اللي فاتت دخلت الشغل وفي أيدي شنطة فيها الكاميرا بتاعت شيرين و3 مصليات كان محمد السيد باعتهم معايا لديمة وبنت بلد ومصعب الخير من أيام ما كنت في اسكندرية، الكلام ده من قبل رمضان بس أنا كنت بأنسى أوديهم لأصحابهم علشان مبحبش أشيل حاجة وانا ماشي وربنا يسامحني علي تأخير الأمانة،.

طلعت أول مصلية وأديتها لمصعب فرح بيها أوي وقالي إن فكرتها صايعة موت، علي فكرة دي مش مصلية قماش عادية دي مصلية بلاستيك بتتشال في الجيب، والتانية لديمة، اللى أول لما عرفت أن المصلية من محمد السيد قالتلي "علي فكرة ياء كان عامل قصة مصورة علي المدونة بتاعته بعد حفلة عشرينات بتاعت هنغني للمقاومة وكتب وكتب إنها إهداء لأحمد الهواري وللنيل".

أنا طبعا فصلت منها وقعدت أقولها بجد وهي تحلف بالله، معلش يا جماعة أصلي فرحت قوي، أول مرة في حياتي حد يعمل حاجة ويهديهالي لأ وإيه أنا والنيل في إهداء واحد.. الفرحة مكانتش سايعاني.

تاني مرة

يوم الأريعاء اللى هو كان تاني يوم وإذ فجأة وإحنا قاعدين في الشغل مصعب قالي "علي فكرة أنا لقيت مدونة حاطة لينك للمدونة بتاعتك"، طبعا أنا رديت وقلت " ياراجل.. بتتكلم جد" صدقته بعد ما قعد يحلف، مع أن مصعب من الناس القليلين اللي لازم تصدقه أول لما يقولك علي حاجة مش محتاج يحلف، بس أعمل ايه مكنتش أعتقد أن في حد ممكن يحط لنك لمدونتي ده غير أنه ميعرفنيش. المشكلة بأه أن مصعب مكانش فاكر اسم المدونة.

النهاردة عملت سيرش لغاية لما عرفت أن المدونة دي هي مدونة "سوسة المفروسة".. شكر خاص لسوسة وأتمنى أنها تفضل مفروسة علطول علشان تفضل تكتب حاجات حلوة زي اللى بتكتبها، وأحب أقول لكل اللى أعترضوا علي اسم dead man، وgrave، وقعدوا يقولوا ليه كل ده ومنهم اللى قال إني بمثل ياريت يعملوا سيرش زي اللى أنا عملته علشان يعرفوا كمية الناس اللى حاسين ده بالعربي والانجليزي.

أقل حاجة أرد بيها علي الفرحة اللى سببتهالي سوسة المفروسة أني حطيت لينك للمدونة بتاعتها عندي

الفرحة الكبيرة

أخر أكبر فرحة مرت عليا كانت إمبارح، علشان إمبارح كان كتب كتاب براء وبنت بلد، كتب الكتب كان في كفر الشيخ اللى أنا سميتها "الشيخ كفر"، وعلي الرغم من إني حضرت أفراح كثير الا أن ده فرح من الأفراح القليلين اللى الواحد حضرهم وهو فرحان بجد وقعدت أرقص لغاية لما أتهد حيلي مع أنى كنت تعبان.

وزاد من فرحتي الفرحة اللى كانت باينة في عين براء وعروسته، ربنا يخليهم لبعض، وعين مصعب اللى عيط من الفرحة، وأحمد الدريني وأحمد فؤاد وأحمد ندى ويارب نفضل علطول أصحاب.

هناك 5 تعليقات:

ياء يقول...

ربنا يديم افراحك
بس خلاص

غير معرف يقول...

حمدالله على السلامة..

واوعى تقول كده تاني
أنا كنت مفتقدك هنا

ربنا يديم عليك الفرحة يا رب من غير ما تحصل بعدها مصايب :)

أنت صيطني أوي يا برنز، و كده علي يا مان .. كتير (بطريقة خالد الصاوي والصاوك والصاونا كلنا)..

وبعدين يا عم في ناس كتير بتحبك بجد وأنت غالي عليهم.و اوعى تقول كده على نفسك تاني

و بعدين خد هنا... أنت لازم تفحني يعني؟!!
كان بيني و بين العريس .. تروح رازعني هنا الفضيحة التمام؟
منك للـ GOD
:)

ربنا يخليك يا برنز .. و البرنز الصغير .. (كمل أنت)

صبارة يقول...

كلمتي يا يحي بس خلاص

ازيك الهواري

مبروووووك للجميع وعقبالك ياااااارب

وسلام للجميع, وياسيدي خلاص انا عندي احباط وعادي عايز تخليها فوق تحت المقبره انت حر
وسلام للحاجه مني

samar يقول...

عندي 3 حاجات أقولهم:
أولاً: رغم إنك ممكن تفكر إن كلمة بوست ممكن تتفهم لأول وهلة علي إنها تصريف من كلمة بوسة إلا إني أنا مثلاً من أول لحظة فهمت قصدك, مش عارفة الظاهر الواحد بيقعد قدام مدونات زيادة عن اللزوم
ثانياً: رغم إنه ممكن يتفهم من إسم و تصميم مدونتك إنك شخص سوداوي عندك ميول إكتئابية لكن بالعكس بعد قراية المدونة يتضح إنك إنسان مرح و محب للحياة و دمك خفيف
ثالثاً: ألف مبروك لبراء و دعاء و ربنا يمد في عمر صداقتكوا طول العمر إنشاء الله

بنت امي الغالية يقول...

أبو حميد الجامد قوي ، مش عارفه ليه انت مسمي نفسك الاسم الغريب ده على فكرة يا جماعة الهواري بيضحك كثير قوي ودمه خفيف ولطيف قوي كمان بس مش عارفه ايه مووضع الموت اللي مسيطر عليه ده

بس خير يارب ربنا يديم عليك الفرحة على طول وتبقى كل يوم فيه فرحتين ثلاثة مش فرحة واحد ربنا يكرمك يا احمد ويفرحك دايما
هذا على الصعيد الخارجي اما على الصعيد الداخلي فالهواري قد قام بمجهود لايمكن تعويضه في فرحنا الصغير فعلا الهواري تعب جدا وانا كنت فرحانه بيه قوي ومستغرباه كمان

عقبال فرحك يا عمنا ونتعب لك برضه