الاثنين، نوفمبر ١٣، ٢٠٠٦

حاجات افتكرتها



التدوينة دي كنت فاكر أنى اكتبها عن حاجة بس ايه هي مش فاكر.. فقررت أني مكتبش حاجة لغاية لما أفتكر أنا كنت عايز اكتب إيه لغاية لما دخلت النهاردة علي مدونة مصاعيبوز علشان أعلق علي تدوينة عنده كانت بتدور حوالين السؤال الأزلي اللى أنا بحب أسأله لأي حد لما تجيلي الفرصة "ايه كان انطباعك الأول عني".

وأنا بعلق علي الموضوع أفتكرت شوية حاجات.. أفتكرت الأيام اللى كنت شغال فيها مع مبلط السيراميك، سبع سنين، قد إيه كانت أيام جميلة وكلها ضحك علي الرغم من المجهود البدني اللي الواحد كان بيعمله.. ضحك وشغل وحزن وحب وتعب وفرحة.. صفاء نفسي رهيب بفتقده بشدة.. التعب الممزوج بالفخر لما أرجع أخر النهار وأنا جلدي متآكل بسبب الأسمنت ووالدتي بتقولي معلش متشوفلك شغلانة غير دي ..

أفتكرت أد ايه أنا بحب والدتي وأد ايه الحياة كانت هتبقى موحشة من غيرها وأد ايه الواحد مكانش هيعرف يعمل حاجة لولا أنها واقفة وراه وأد ايه استحملت علشان خاطري أنا وأخواتي وأد أيه.. وأد إيه..

أفتكرت أن أنا كنت عايز أكتب تدوينة في أول يوم رحت فيه الشغل ومكانش مصعب موجود علشان أقوله أد ايه أن المكتب وحش من غيره لكن الحمد لله هو رجع المكتب تاني أقبل ما أكتب حاجة، وادينا سهرانين مع بعض وبنسمع فيروز وأصالة..

أفتكرت أن أنا كنت عايز أسأل علي "صبارة" أو "هوووبة" أو "هبهوب" أيا كان اسمها الحقيقي.. أسال هي بطلت تعلق في عشرينات وولاد البلد ليه.. وقفلت المدونة بتاعتها ليه.. بس للأسف مش عارف أسأل مين.. حاسس أنها كده مش تمام وفي حاجة مضايقاها بس مش عارف ايه.

افتكرت أد ايه الدنيا وحشة.. وحلوة.. افتكرت أني بعيط وأنا بكتب التدوينة دي.. وفوق ده كله أفتكرت أنا كنت عايز أكتب ايه في التدوينة دي...


ألا صحيح أنتا كان ايه الانطباه الأول اللى أنتا خدته عني؟؟


هناك ١٢ تعليقًا:

غير معرف يقول...

مش هأقول لك غير "إنســـااااان"

بس خلاص..

انطباعي الأول، مش عارف بس كنت حاسس إنك شاب مختلف تماما عني، أي نعم كنت محترم شخصيتك، و عدم خوفك المتمثل في الموضوع إياه اللي كنت بتقترحه "فاكره؟"

بس ما أعرفش ليه زعلت ساعتها إننا ممكن ما نكونش أصحاب

بس الحمدلله، زي ما أنت قلت، قاعدين بنسمع أصالة وفيروز دلوقتي :D

غير معرف يقول...

ودموعك غالية يا كابتن ،
اوعى في يوم تدمع "إلى على كل شيء غالي"

dead man يقول...

علي فكرة الموضوع عملته ونزل بس أوعى تقول لحد هو أيه لحسن يجيبوه من الأرشيف وأحصل عم طلعت السادات
اما علي موضوع الدموع ده فأنا بحاول :)

dead man يقول...

وعلي فكرة سؤال الانطباع ده لكل اللى يقرأ التديونة واللي ميقراش

واللى عنده معلومات عن صبارة يقولها والأجر والثواب عند الله

غير معرف يقول...

شوف يا هواري مش عيب انك مبلط سيراميك او الخ من الشغل طب ما انا طلع عين اهلي في لاشغل وفي الفتره اللي فاتت دخلت المستشفي
من ضغط اعصاب ومسح وتنضيف مفيش حاجه سهله كلوه بياخد علي نصيبه علي الاقل , انت في بلدك وسط ناسك انا لما بتشتم يا بني في اليوم اكتر من مره وبالعنجليزي شتايم عشان مسلمه وعشان معرفش نسيت الحجم كان ايه ولازم سرعه وخناقه كل شويه مع الكستمر
علي العموم انا الانطباع الاول عندي وبدون زعل انك محبط شويه شويه بعد مدونه تسينم حست انك انسان بجد وتستهال خير وبتشتغل وشفت الوحش من اللي النضيف
وعندك تجارب في لحياه
وكام تعليق ليك في عشرينات
باسم dead man
حست الاسم محبط بس الحمد لله
بعد كدا شفت مقالات وفيها هزار وان انت انسان عادي وبتسمع فيروز كمان
وعلي الرغم من كدا
والله انت في نعمه مش
حاسس بيها انا لو احكيلك علي الشباب اللي معايا تعيط احمد ربنا وفكها شويه مع انك فاككها
وربنا يكرمك يا ررررررررررب
ليه مبعلقش علي عشرينات عادي شويه وارجع اعلق حسب الوقت حاليا ابديت دراسه السمستر دا مهم جدا فواخد وقتي وحعلق ان شاء الله لما يجي وقت

ام مليكة يقول...

ايه يابني ...كل دي مشاعر رقيقة غريبة قوي مع ان اللي يشوفك ميحسش كده بس هو كده الناس اللي مستخبيين ورا القشرة السميكة دايما يبقوا اطيب من الواضحين

انا بصراحة من اول ما شفتك وانا حاسه انك ابن بلد ومختلف عن الباقيين من ايام وسط البلد الله لا يعيدها واتغيرت نظريتي فيك كثير في وسط البلد مكناش صحاب وفي ايجي فوت كنا قريبين من بعض اكثر وفي عشرينات جيران وصحاب وفي ولاد البلد ...متحررين من كل القيود

انت حد نظيف وانا اكثر حاجة باحبها فيك ياهواري بصراحة ومن غير زعل هي حبك لوالدتك الجميلة صاحبة النفس الجامد في صنع الكبدة البانية

خلي بالك من هواري

marwa salah يقول...

بصراحة بصراحة يا هواري أول ما شوفتك مكنتش مستريحة أوي وفعلا اللى يقرب منك ويشوفك غير اللى يعرفك من خلال الماسينجر، المشكلة انى عرفتك يا هوارى من خلال الصورة اللى ما يعلم بيها الا ربنا اللى حاططها عندك على البلوج وكنت بتكلمني بالليل عشان نتفق على الموضوعات وان كنت باتخنق من الصورة جدا جدا ..

المهم بعد ما جيت عشرينات فضلت صورتك عندي منعكسة من نفس الصورة دى لحد ما عرفتك كويس ولاقيتك انسان محترم أوى وراجل أوى في مواقفك وبن ناس أوي ... بس خلاص لاني مبعرفش اوصف الشخصيات أحسبك علي خير ولا أذكي علي الله أحداً

ربنا يكرمك ويقدر لك الخير حيث كان .

غير معرف يقول...

احنا صحاب اوى
ده اللى انا فاكراها دلوقتى
لكن طبعا اول معرفتى بك كانت زفت عشان تجربة جورنال وسط البلد ده، وكنت واخدة موقف منك زى ما انا واخجة موقف من كل الناس اللى هناك

واول مرة شفتك كنت رابح انت وريم تعملوا حوار مع عبد الحليم قنديل وماعجبنيش السجاير اللى فى ابدك وطريقة كلامك كأنك بقى واد مكحرت وابن بلد زيادة عن اللزوم

والله ده كان انطباعى ايه اللى حصل بعدها فى مرة وخلى الحكاية تقلب مش عارفة ، بس انا اكتشفت بعد مرتين بس انك انسان ظيب ونظيف بغض النظر عن اى حاجة تانية ممكن مش يكون من المهم انى احاول اعرفها لا ساعتها ولا بعدين

كفاية انى وائقة انى باتعامل مع انسان نظيف

والمقدمات دى كانت مناسبة جدا بعد كده عشان انا وانت نعمل عصابة على العصابة اللى هناك وفى الآخر ضحكوا علينا وكلوا فلوسنا

يلا كل نصباية وانت بخير ومعرفتنا بخير ان شاء الله

ومافيش مشاكل انك تعيط يااستاذ بس بشرط تبقى احسن بعدها او على طول ياريت

وزى ما قلت لمصعب عايزة ابعت لك وش بيضحك ووردة بس مش باعرف

غير معرف يقول...

انا لما شفت شعرك المكوي والمتدلي كجلمود صخر حطه السيل على جبهتك قلت انك واد من اياهم لكن طلعت متمرط زينا في الدنيا وخريج مدرسة الحياة الصعبة بس ياحلو انا كنت فاشل ولا عمرت في اي شغلانه ..تخين ياعم و وكلي خسارة سعت الاكل فقط يدب في النشاط فضلا عن النقاشات التي بصريخ صاحب العمل ياعني اسب للعولمة والمشروع الحضاري
تحية للايد الخشنةالتي تبلط الحروف على ارضيةالمعنى

أبوعمر يقول...

هي الحكاية فيها دموع وبتاع وشاي بالنعناع
انت طبعاً مش عايز رأيي زي ما قلتلي في البلوج انت عايز الصراحة..حاضر..خد الصراحة
أول معرفتي بيك انك كنت بتحضر المحاضرلت متأخر وكنت باعتبرك بتنفضلي لكن ما كنتش باحسسك، وعادي..اللي ياكل على ضرسه ينفع نفسه. طبعاً كنت متجمع انت والشباب الجامدين بتوع الدفعة اللي عاملين كده زي الضباع واللي بيقعدوا دايماً في آخر بنجشين تلاتة عشان يرموا الإفيهات على خلق الله وكنت طبعاً فاكر باعمل معاكم ايه ومع مرور الوقت علاقتنا بقت ممتازة.يمكن لهجتك وطريقة كلامك في الأول هي اللي حسستني انك واد لافف والأسفلت خاتم عليك،والنوع ده عادة مالهوش في التعليم.لكن فوجئت جداً بأسلوبك في الكلام في القضايا الجامدة ومواضيع الجدل اللي على حق ربنا. واد فاهم وعارف هو بيقول إيه، ولما درستلكم مقال في السنة اللي بعديها كان طبيعي جداً اني اتبسط بكل شغلك وخصوصاً اللي كنت بتكتبه عن إيران و التحليلات اللي كنت بتكتبها وكنت ساعات بفتكر انك ناقشها من حتة انت و احمد عبد الجليل.لكن ايه ده..إوعي..الأسلوب جامد و الشخصية عن قرب تحفة و الجدعنة مفيش بعد كدة.حتى كلامك عن زمايلك اللي انا عارف انك مخنوق منهم أو من سهوكتهم كان بيبقى من غير تجريح..اللي ف قلبك على لسانك بجد..حبة كمان ولقتني معجب بتفكيرك وشايفك حد جامد جداً في المكان الغلط..،ولسة لغاية دلوقت بالمناسبة شايفك في المكان الغلط لكن هي الدنيا كده.واد رجولة و مجدع وواحد من القليلين أوي اللي دخلتهم بيتي و اتكلمت معاهم بصراحة..عايز الحق..انت من الناس القليلين اللي قابلتهم وكان نفسي يبقالي أخ صغير بنفس المواصفات؟، ولو فتحت الكتالوج على صفحة الواد المجدع ابن البلد أكيد هتلاقي صورتك
محمد

dead man يقول...

مصاعيبو.. أعتقد أنا رديت عليك
-------
هوووووبة.. برضه مطمنتينش عليكي ولا قولتي أنتى قفلتي البلوج ليه
وعلي فكرة أنا عمري ما اتكسفت من أني كنت شغال مع مبلط سيراميك علي العكش أنا ككنت فخور وافتكر انى مرة قلتها لدكتور في الجامعة في وسط السيكسن وبالصوت الحياني
--------
بنت بلد.. ربنا يخليكي علي الكلام الجميل ده.. بس هو صحيح انتى قصدك بنفس ماما في الكبدة البانية أن المحشي كان وحش ولا ايه ..
:d
----------
mora
مش عارف أقول ايه بصراحة .. متشكر
-----------
ديمة
بحمد ربنا أن احنا أصحاب وعلي فكرة انا اتنصب عليا 3 أرباع نصباية علشان أنا خدت حوالى 180 جنيه هما أه مش حاجة في شغل كام شهر بس يلا وعلي فكرة أنا كنت حابب تجربة وسط البلد قوي
نفسي أبطل عياط أصلا بس يلا اللي فيه طبع بأه
الوردة وصلت
------------
أ عبد الله الطحاوي.. كفاية أقولك أن أنت من أطيب الناس اللى أنا قابلتهم في حياتي
أنا بس عايز أقولك أن شعري لا مكوي ولا حاجة هو الحمد لله حلو لوحده.. وبعدين لا متنلي لجلمود صخر ولا حاجة أنا شعري طاير علي الخدود يرفرف :d
حبيبي والله يا باشا
-----------
أبو عمر
والله العظيم انتا كبير أوي .. كلامك فرحنى أوي وثبتني من الفرحة وشرف كبير لي أنىأكون أخوك الصغير وعلي فكرة في كتالوج الواد المجدع ابن البلد صورتك في أول صفحة

علي فكرة واحشني موت

غير معرف يقول...

حلوة الفلقة دي ياهواري ...مش كانت فلقتين أحسن