السبت، يناير ١٣، ٢٠٠٧

بننجرح.. كل يوم

لكن بيفرحنا أن أنتا جوه القلب ساكن.. ساكن في أفرحنا..

ما أجمل أن يكون لك بعض الأصدقاء تحبه وتعشقهم وتتمنى لقائهم.. وبعد أربع سنوات أنتم ما زلتم أصدقاء.. تتمنى أن تراهم أكثر ويصبحوا أكثر من أخوتك وأطفالك.. تأخذكم الدنيا بعيدا عن بعض ولكنهم لازالتم أصدقاء تتقابلون كلما أمكن.. وعلي الانترنت كلما لم يمكن..

ده أنتا الأمل في العيون والنشوى ساعة الجنون.. واياك تكون زيهم وتروح وتجرحنا..

بداية اليوم كانت رائعة.. وعندما أقترب من نهايته كانت أكثر من رائعة.. تخطو خطواتك في المنزل بعد العودة ببعض التفاؤل وتجلس أمام الكمبيوتر.. تستمع لمنير وتبدأ في الحديث إلى أصدقائك.. ترى واحدة ممن تطلق عليهم الحرس القديم اللذين إن مالت الدنيا لن يميلوا.. تنتفض فرحا وتبدأ في الحديث..

ده انتا الوحيد منهم تقدر تريحنا.. تقدر تريحنا..

بعد أزيك.. وعاملة إيه.. تحدثك عن شيء في حياتها كنت تظن أن صداقتكما تجعلك أول العالمين به.. تبدأ في الحزن عندما تعلم أنه قد انتهي.. وتحاول أن تبدأ في مداواة جرحها.. والطبطبة والحنية..

وهنا تفاجأ بشيء غاية في الروعة.. أنه أيضا من الحرس القديم.. الحرس الذي استدعيته كاملا لأن تعلن لهم أنك "معجب بفلانة".. أي والله معجب بس.. تشعر بشيء يخترق صدرك.. تتذكر كلام الطبيب "متزعلش نفسك كثير".. في النفس الوقت الذي تقول هي فيه "متزعلش".. تصمت انت قليلا لتقول.. أنا مبزعلش.. مبعرفش أزعل من حد.. أنا بس باتجرح..

تتذكر كلمات قلتها لأحدهم من يومين بالضبط "انا مبتجرحش غير من الناس اللى بحبهم".. تدمع عيناك وتبدأ في الاحساس بالبرد.. علي الرغم من أنك لم تشعر بالبرد من قبل.. تحتقن عيناك أكثر ترتجف من البرد.. تسألك من جديد ألا تزعل فتقول لها "والله أنا مش زعلان.. بالعكس أنتى وريتيني حاجة أنا مكنتش شايفها من زمان" وعندما تسألك عنها تقول "اننا في زمن لا عاد في حبيب ولا صديق.. زمن البني ادم فيه ولا يسوى حاجة"...

تنادي عليك مرة أخرى قائلة "مش تزعل".. فترد قائلا "أنا مش بزعل"، أنا بس.. بنجرح..

بننجرح.. كل يوم لكن بيفرحنا أن أنت جوه القلب ساكن.. ساكن في أفراحنا..

وانتا الأمل في العيون والنشوة ساعة الجنون.. واياك تكون زيهم وتروح وتجرحنا..

ده انتا الوحيد منهم تقدر تريحنا.. تقدر تريحنا..

أعتقد أنه محدش محتاج أني أقوله أن الأغنية لمحمد منير..

هناك ٣٥ تعليقًا:

دعاء عادل يقول...

ده انت الوحيد منهم تقدر تريحنا
بص يا هوارى ماتراهنش على شخص واحد عشان ما تتجرحش وحتى لو اتجرحت عادى كبر دماغك ونفض خااااااالص
انت انسان جميل وتستاهل كل حاجه حلوه وتستاهل حجات كتير اكتر من كده
بس انت خلى بالك من نفسك بس ومتخنقهاش
وعاملها زى ما تستاهل
وخلى بالك انشوه ساعة الجنون بس
وانت اكيد عارف ان النشوه ساعة الجنون فقط
وربنا يوفقك

محمد السيد..مش حاسكت يقول...

حرام عليك نفسك بقي ...

طيب ما تيجي نتكلم في الحاجات الحلوة شوية ؟؟

ماتكلمنا عن مصعب ؟؟؟ عن بين الجيران ؟؟..

ما تكلمنا عن الأيام الحلوة بتاعة الحرس القديم ؟؟

ولا كلمنا عن حلوان وحلاوتها ... المكان واليونيفرستي ؟؟

ولا تكلمنا عن أول موضوع اتنشر لك ..؟؟

أو أقولك ؟؟كلمنا عني ؟؟؟إيه رأيك ياعم ؟؟؟
حتي شوف لي عروسة يا أخي ...

بص من الآخر ... اسمع وجيه عزيز وسيبك من كل الكلام ده ....

زعلان شوية؟

يلا ..سلام ...

وحشتني بجد يا ابني .... سمعنا صوتك ولا...ورينا البني آدم الجميل ده

Mony The Angel يقول...

:(
:s
:'(

bagabigo يقول...

مش هاقولك انسى و مفيش حاجة تستاهل انك تزعل و انك اقوى من كل دا عشان الكلام دا مش هايريحك لأنه كلام لكن هاقولك لما تتجرح دور على حضن ترتاح فيه دور على حد تقوله بأعلى صوتك انا مجروح حد يمسح دموعك حد انت عارف انه هيطيب جرحك بجد مش هيواسيك بكلمتين

Unknown يقول...

السلام عليكم
سبحان الله الاغنية دى كنت بسمعها اليومين اللى فاتوا كتير .. وعمالة اقول لنفسى مين فى حياتى ينفع اقوله الكلمات دى؟؟؟
الاجابة طلعت إنه مافيش

المهم دى اول مرة ادخل فيها مدونتك بصراحة كنت بخاف ادخلها عشان الشكل المرعب جمبها مكتوب راجل ميت .. انا قلت هدخل الاقى هياكل عظمية وانا مبستحملش.. جرأت نفسى وسلمت على اهل المدونة ودخلت برجلى اليمين .. ربنا يستر
لا بس جميلة اوى مدونتك وإن شاء الله مش هتبقى اخر مرة ليا هنا
سلام عليكم

smraa alnil يقول...

دائمة نفسك موجودة

Memo يقول...

يا ابني كلو نكد نكد غير شويه مفيش امل مفيش بكره مفيش افكار حلوه فين الفرحه
فين المستقبل
اسلوب جميل بس شويه تفائل

أسوور يقول...

انت جميل قوى
حساس قوى
انسان قوى
حاساك زى ماتكون رجل يتسلق جبل
بيعافر ويحاول عشان يوصل للقمة
طريقه كله صعاب لكن مش خايف يقع عشان مش فارقة معاه
دى سمات الإنسان الناجح
انت انسان ناجح مش ميت

دة رايي فيك

Amira Hassan يقول...

أنا مبزعلش.. مبعرفش أزعل من حد.. أنا بس باتجرح..
متتصورش الجملة دي رشقت فيا ازاي..
بس اللي اقدر اقوله انك لازم تفكر بقى في الحرس القديم :)

tamer afify يقول...

احساس جميل منقول عبر البوست
أجدت العزف بكلماتك لتخرج لحنارائعا
تحياتي

Abd El Rahman Magdy يقول...

مش عارف أقولك إيه
بوست أكثر من رائع
هأقولك حاجة لما تنجرح فكر في حاجة حلوة
قلب في ذكريات الطفولة السعيدة قبل ما يبقى في مشاغل وهموم
وما أظنش إنك ما عندكش ذكريات سعيدة ولو ما عندكش اخترع ذكريات سعيدة عيش فيها لحد ما تفك من الخنقة
وربنا ما يخلي في جراح أو أحزان
فك عن نفسك شوية

كراكيب نـهـى مـحمود يقول...

بوست جميل وناعم انا بحب الاغنية دي اوي اوي مقاطعها كانت في ودني وانت بتقطع بين البوست بكلماتك الشجية

Unknown يقول...

انا مش هقولك ماتزعلش, انا هقولك ماتتجرحش لو ان دي حاجه مستحيله طب ماكمان ماتزعلش مستحيله يعني هو في حد بيزعل نفسه عشان نقوله ماتزعلش؟
بس انت انسان حساس أوي وصدقني هتعدي حتي ول اخدت وقت.

LAMIA MAHMOUD يقول...

واياك تكون زيهم وتروح وتجرحنا .. ده انت الوحيد منهم تقدر تريحنا:(

مش محتاج تقول ان الاغنية لمنير لاء
:_(

مُصْعَب إِبْرَاهِيم يقول...

بس هتعمل ايه فيهم..

تصحى تاني يوم وكل يوم علشان تتجرح..

ما هي يا هواري دنيا دايرة غصب عنك عني
بايدينا ايه غير نغني..

نفرح نغني
نحزن نغني
نتعب نغني
دايما نغني

وكل يوم .. بننجرح

Dananeer يقول...

ان شاء الله تعدى
المهم خليك برا

حلو و حزين و شجى كالعاده

مُصْعَب إِبْرَاهِيم يقول...

ربنا يسامحك.. نزلت أصلي وأنا مش شايف قدامي

زي ما أكون شايفك قدامي قاعد على المكتب
ولسة ابتسامتك موجودة.. وشوية شوية وأنت بتكلمها ابتسامتك بتروح..

وروحك بتتسحب منك واحدة واحدة..

وعينيك عاوزة تدمع ومش عارفة..

وجواك كتير أوي ومش راضي يطلع..

ومشغل الأغنية في الهيدفون، وعامل لها repeat

والدتك تدخل عليك الأوضة تكلمك عادي تحس إنك متغير، تسألك مالك... ترد تقول لها مفيش..

تحتار هي وتخرج، وأنت تحتار أكتر

وترجع تاني لشاشتك...

وتكتب.. وتمسح وتكتب تاني..

ومفيش حاجة من اللي بتكتبها قادرة تطلع اللي جواك..

وفي الآخر ما يهونش عليك تسيب اللي بيقروا من غير ما تضحكهم وتقول لهم:
"إنك مش محتاج تقول إن الإنية لمنير"...

طيب دول بقية الناس..
ليه تعمل في أنا كده؟!

ربنا يسامحك
(f)(f)(f)

مُصْعَب إِبْرَاهِيم يقول...

أقول لك؟!!

اضحك الصورة تطلع حلوة

محمد السيد..مش حاسكت يقول...

أنا برضه مش عرف أقول إيه؟؟


عموما يا عمنا ..... لما بتحصلي حاجة زي دي ... بأقعد لوحدي ... أحلي حد ممكن تقعد معاه هو ... إنت ..

يااااااااااااااااااه ... إنسان سامعك ...فاهمك ... بيحبك ... خايف عليك ... وفوق كل ده ...ذكرياتكم مشتركة ..

ابقي اقعد معاه كتير ... صدقني ..

حيطلع أكتر واحد قريب منك ... وبيفهمك ....


وفي الآخر برضه .....


مش عارف أقول لك إيه؟

shimaa يقول...

أنا مش بزعل ..أنا بس بنجرح:(

smraa alnil يقول...

مش عارفة بس بعد ما مشيت
لقتني بدخل عندك وعايزة ابعتلك دي
(f)
واقول
ان احساسك بنفسك دايما صح
واحساسي بنفسي دايما برضه صح

ربنا يخليلي نفسي
:)

elkamhawi يقول...

قشطة صباح الفل يا كبير
ايى يا كبير اخبارك اية؟والله واحشنى
انا اليومين دول فى الاسماعيلية وبأذن الله اما ارجع هبقى اشوفك اكيد
وبعدين عايز اقولك هذا
هو الكون يا عزيزى

غير معرف يقول...

"انا مبتجرحش غير من الناس اللى بحبهم"...
يارب متتجرح اساسا ياعم احمد
هي مش ناقصة جراح اساسا

We2am يقول...

ana msh ha2dr 22ol 7aga hena :(

nour يقول...

و لا يهمك
اضحك الصورة تطلع حلوة فعلا على رأى مصاعيبووز

emz يقول...

:'(

raspoutine يقول...

dead man
انا ايمن فاروق وده البلوج بتاعى لان التانى حسيت انى اتجرحت فيه من ناس وجرحت برضه ناس تانيين لانه فعلا وهقولها تانى اللى بيحب اوى يااما انجرح اوى او بينجرح فعلا او لسه هينجرح انتا بقيت متأكد ان اى حب بيبقى اخرته جرح اى حب حب الصديق حب الحبيب اة حب والسلام

frozen love يقول...

هو الجرح مايجيش غير من القريب اصلا..دي قاعدة..ونصيحة لما تقضي يوم حلو اول حاجة تعملها لما تيجي تنام..انا والله بعمل كده عشان متحصلش حاجة تمحي سعادة ايوم كله

saso يقول...

تاني جرح ؟ مش عيب ان الناس تكون بشر وانت ملاك الدنيا بتشغل اوقات وتوقع حاجات مكانش ينفع تقع بس هيا برضة مش عيبها لانها دنيا..انت اللي ابيض اكتر او حساس اكتر
اقعد لوحدك علشان اقرب حد لطبعك الملائكي هيبقي انت

وحد يبقي عندة مصعب ويزعل دة انا خاسة اني عرفتة وباعزة من كلامكم سوا

أسوور يقول...

عاوزين بوست جديد

dead man يقول...

دعاء عادل
ربنا يخليكي علي الكلام الجميل ده..
مش عارف أقولك حاجة تانية
------
محمد السيد
وانتا كمان والله واحشني.. بس
-------
Mony The Angel
(f)
-------
bagabigo
طيب واللى مش لاقي اللى انتى بتقوليه ده .. يعمل ايه ؟
---------
Human
أهلا بيك..
وكان المفروض وانت داخل تقول السلام عليكم دار قوم مؤمنين .. :D
الأموات كلهم بيرحبوا بيك
---------
smraa alnil
ربنا يخلي نفسي
(f)
--------
Memo
والله ده اللى موجود كله نكد وتشاؤم علشان الكلام اللي انتا بتقوله ده منعرفوش..

ومشكور علي المرور
----------
ياسمين
ربنا يخليكي يا رب
وعلي فكرة انا بطلت أعافر من زمان
بلاها قمة .. خلينيا في القاع
----------
Amira Hassan
ألف سلامة عليكي من الرشق
وعايز أقولك ان مش علشان واحد ولا اتنين من الحرس القديم جرحونا يبقى نحل الحرس كله.. عادي يعني بتحصل في أحسن العائلات ..
:D
---------
tamer afify
ربنا يخليك وأهلا بيك في المدونة
وان شاء الله تكررها...
---------
عبووووووووووووود
ربنا يخليك.. حاولت أخترع ومش عارف.. مفيش اختيارات تانية؟؟
_________
كراكيب نـهـى مـحمود
ربنا يخليكي
شكرا
--------
esraa
ربنا يخليكي.. عدت من ساعتها والله
-------
LAMIA MAHMOUD
(f)

الوردة السوداء يقول...

انا مش بزعل
انا بس بنجرح

الله عليك
انت صورت حالة كانت جوايا
بس انا معرفتش اوصفها زيك
انا مش عارفة اقول اكتر من كدة

تحياتى

الوردة السوداء يقول...

على فكرة
الصورة اللى انت خاتطها
فى البروفيل مش حلوة خالص

بجد سيئة جدا
ومش لايقة مع كلامك

dead man يقول...

مصـ( الخير )ـعب
بايديا ايه غير أني أغني :)
-------------
Dananeer
والله بره من جوه مبقتش فارقة
ربنا يخليكي
--------------
مصـ( الخير )ـعب
ليه يابني كل ده .. مانتا عارفني .. أكثر من كده وربك بيزيح
---------------
مصـ( الخير )ـعب
دي الصورة.. بس انتا عارف مبدأى .. علي الأصل دور
نياهههههها
-----------
محمد السيد
عارف بأه أنا أكثر واحد بكره أقعد معاه هو انا
------------
shaimaa
تكشريتك تعز علينا
------------
smraa alnil
ربنا يخليكي.. ويخليلي نفسي
(f)
-----------
elkamhawi
اديك رجعت.. ورينا هنشوفك امتى
:D
----------
أحمد يكتب كما لم يكتب من قبل
ربنا يخليك يا كبير
بس انتا عارف ده مش بايدينا
----------
we2am
من غير ما تقولي.. احساسك وصل
---------
nour
ولا تحسبن رقصي بينكم طربا.. فالطير يرقص مذبوحا من الألم
----------
aymen.farouk
ربنا يخليك
-----------
emz
never cray on grave.. it makes the dead pplz more sadness
-----------
raspoutine
ساعات احنا اللى بنجرح نفسنا ونقول الناسي هي اللى جرحتنا
-----------
frozen love
واللي مبيعرفش ينام يعمل ايه.. دبرني يا وزير
--------------
saso
ربنا يخليكي يا عسل.. أنا لا ملاك ولا حاجة.. ان شيطان بس لسه بيتعلم..
---------------
ياسمين
ان شاء الله قريب (f)
-----------
الوردة السودة
مش لازم تقولي حاجة.. المهم الاحساس
----------
الوردة السودة
الصورة دي موضوعها طويل أوي..
:)

Oma يقول...

اولا انا بمووت في منير وهو بيغني بننجرح
الاغنيه دي بتعمل فيا حاجات غريبه
ميرسي انك خليتني اشغلها دلوقتي

تانياً البوست روووعه
فيه كلمه كده مصطفى شعبان قالها في احلام عمرنا
احنا لما نحب اول بننجرح اوي !!

وكتير بننجرح..مش بزعل..لا اتجرح من حد بحبو..ماتعرفش تزعل..بس يجرحك انو عمل حاجه معاك !!

احييك على اسلوبك..وميرسي عشان الاغنيه..هي اللي حببتني في البوست وخلتني اقراه :))